Baad El Nesyan

صحي في يوم مش فاكر من حياته أي حاجة

سأل نفسه أنا مين و قام يدور على إجابة

لقى في دولابه صورة صاحب عمره قال محمد

أنا فاكرك و بدأ ييجي في باله أكثر من مشهد

لقى موبايله ولقى الرقم طلبه بدون تفكير

رد صاحبه بـياه يا صاحبي فينك من كثير

أنا فقدت ذاكرتي عشان كده اتصلت

خليها تحكي لك إزاي علشانها بعت طوب الأرض

بعد ما اتقفل في وجه سأل نفسه مين اللي أنا

بعت عشانها صاحبي وهو بيسأل نفسه لقى

دبلة وتحتيها ورقة مسك الورقة و بدأ يقرأ

صعب عليّ أقبل ماكونش أم أتمنى تفهم

إنهار وكسّر كل حاجة جت في طريقه إتجنن

فين و فين أدرك إن ده مش حل استسلم

يحاط بذكرياته مع مراته كأنه فيها

أي نعم ناسي كثير لكنه إفتكر حبه ليها

في حياتنا النسيان يُعتبر مرض ولا نعمة

أغلب ذكرياتنا حمل تقيل أكيد نسيانها إعفاء

إستسهلنا الغلط وإتجاهلنا صوت ضميرنا

دايما نشبع رغبات دلوقتي على حساب مصيرنا

في حياتنا النسيان يُعتبر مرض ولا نعمة

أغلب ذكرياتنا حمل تقيل أكيد نسيانها إعفاء

إستسهلنا الغلط وإتجاهلنا صوت ضميرنا

دايما نشبع رغبات دلوقتي على حساب مصيرنا

بعد يومين طوال قرر ينزل بين الناس

قعد على قهوة قابل عجوز مسميينه الخال

سأله مالك يا إبني شايل هم الدنيا لوحدك

رد نسيت الناس، والناس نسيتني إيه اللي يضحك

ضحك الخال الواد إتنرفز سأله إيه مشكلتي تافهة

رد يا إبني أنا إبني رماني في الشارع إديني مرضك لفة

في الآخر خذه يكشف له و قال له يا إبني ثق في الله

و الدكتور طمنه هتفتكر بالوقت والعلاج

رجع بيته و حبس نفسه لمدة أسبوعين

أدوية و تمرينات ذاكرة بالكاد إفتكر شيئ

قبل ما ينهار عصبيا قال ينزل يرغي مع الخال

قعد مستنيه ع القهوة و زهق بعد ثالث شاي

سأل القهوجي عليه رد القهوجي بكره غريب

الخال ربنا إفتكره و الله ما أعرف ليه ناسيك

طلع محفظته يحاسب كان زعلان قد ما مذهول

وقعت من محفظته صورة الخال بمعنى أصح أبوه

اللي ناسي بيجري ورا ماضيه و لو دقيقة، دقيقة

و اللي فاكر نفسه يبدل الحقيقة بصفحة جديدة

لو قدامك فرصة تصلح غلطة ما تسيبهاش

غيرك إتأخر على ما فهم إن الحياة ما بتستناش

اللي ناسي بيجري ورا ماضيه و لو دقيقة، دقيقة

و اللي فاكر نفسه يبدل الحقيقة بصفحة جديدة

لو قدامك فرصة تصلح غلطة ما تسيبهاش

غيرك إتأخر على ما فهم إن الحياة ما بتستناش