Symphonia

عصفورة حكيت لي إنها في يوم عدت من جنب غرزة

فوجئِت بإن الله والرُسُل والوجود أغلب ما يُذكر

شافت من كل سن كل شكل واللي رابطهم

جايين ينسوا الحياة اللي شيلتهم فوق طاقتهم

وقالت لي إنها إتفاجئت في المدرسة بإن التلاميذ

جايين لكل غرض تتخيله إلا التعليم

بس قالت لي في وسط السيرك شفت طالب علم بجد

منتبه للشرح بيكتب وملوش أي دعوة بحد

للأسف ثاني مرة شافت الطالب ده بكِت

كانت طايرة جنب قسم صُدفة وفوجئت لما لقت

ظابط بيكهرب الطالب ويقوله علشان تبقى

تكتب وطن بلا تعذيب كويس على تيشيرتك

وحكيت لي إنها في يوم كانت على شجرة قدام باب

مستشفى شافت دكتور خارج من الاستقبال

و واحدة ماسكة فيه بتقول له أرجوك جوزي بيموت

قالها وأنا مالي يا ستّي هدفع لك من جيبي فلوس

صعب توصف الحياة في شكل مُعادلة فيزيائية

سيمفونية كل آلة فيها تبان لك عشوائية

مفيش حال بيدوم والتغيير ملوش قانون

لا الوِحِش بيفضل وِحِش ولا هدايته شيئ مضمون

صعب توصف الحياة في شكل مُعادلة فيزيائية

سيمفونية كل آلة فيها تبان لك عشوائية

مفيش حال بيدوم والتغيير ملوش قانون

لا الوِحِش بيفضل وِحِش ولا هدايته شيئ مضمون

العصفورة غابت عني يومين ورجعت بحكايات

منها إن واحد من مجموعة الغرزة مات

و واحد ثاني فاق قال يا إخوانّا كفاية نسيان

بس دماغهم أعلى من إنها تستقبل الكلام

وفي شارع لقت خلق بتهتف تسقط الداخلية

طارت ورا المُظاهرة وعند القسم وقفت هيّ

لما لقت كل واحد لابس ميري بيغيره

وياويل اللي كان بيعذب ناس وفي ناس حافظين منظره

أما الطالب اللي إتعذب فرد في مجموعة سلمية

الدرع اللي حمى القسم من الأعمال التخريبية

أول ما إتصاب برصاصة قالت هيموت من الإهمال

إستقبله طبيب حقيقي ما خذش نفسه إلا أما فاق

طارت شافت ناس محتاجة تحس بـالناس المحتاجة

شافت كثير ما نكرش لكن ما شافتش كل حاجة

سألتني عن نظام الكون قلت لها هما دول

كل فرد إختار لنفسه شيئ إختار لغيره مليون

صعب توصف الحياة في شكل مُعادلة فيزيائية

سيمفونية كل آلة فيها تبان لك عشوائية

مفيش حال بيدوم والتغيير ملوش قانون

لا الوِحِش بيفضل وِحِش ولا هدايته شيئ مضمون

صعب توصف الحياة في شكل مُعادلة فيزيائية

سيمفونية كل آلة فيها تبان لك عشوائية

مفيش حال بيدوم والتغيير ملوش قانون

لا الوِحِش بيفضل وِحِش ولا هدايته شيئ مضمون