Sokan El Leel

يا اللي بين كل نجمة ونجمة إمتى هتحنيلنا؟

سكننا الليل بالنيكوتين والقهوة يمكن تسمعيلنا

عشان حلاوة الحب واقع بقى الحزن ملة

محدش داق حلاوة الحب إلا وانضملنا

إحنا كتير وبنعرف بعض لإن عيوننا ما بتخبيش

ما بنتسئلش "مالكوا؟" من فراغ، لكن بنقول "مفيش"

إحنا التذكرة الواحدة وسط زحمة الإتنينات

إحنا الخميس بتاعنا ما يختلفش عن التلات

إحنا صمت أقوى من الكلام تعبيرًا عن صاحبه

إحنا اللي بيتزهق منه وبيتقال سيبوه على راحته

اللي بنحسد اللي رافع راسه مع إنه هيتكسر

اللي ماشي باصص تحت رجله ويخبط فيك يعتذر

يا اللي بين كل نجمة ونجمة اوعي تكوني سراب

سكان الليل في الأرض بسببك متشافين أغراب

يا اللي بين كل نجمة ونجمة اوعي تخذلينا

محدش فينا اتعلم إنه يعوم يا سفينة

لعله خير، شر حامينا من الأشر

يمكن أحسن ركوبة لينا ركوبة المضطر

يمكن قدرنا الأب بتاع بعمل ده لمصلحتكوا

لعله فقد ما نملك لإمتلاك ما نستحقه

لعله خير، شر حامينا من الأشر

يمكن أحسن ركوبة لينا ركوبة المضطر

يمكن قدرنا الأب بتاع بعمل ده لمصلحتكوا

لعله فقد ما نملك لإمتلاك ما نستحقه

يا ساكنة الضفة التانية جايلك مش هتأخر

كل شئ في حياتنا لمقابلتنا كان متسخر

اللي عشته أنا وأنتي أرض صلبة نبني حياة عليها

علاقتنا غاية الكون بيدور ودار حواليها

ما تفقديش إيمانك بيا ولا تشكي للحظة فيا

لو هضحي بكل حاجة مقابل حاجة فأنتي هي

من أرض الخوف بحدفلك طرف أول خيط يربطنا

بنكلم نفس النجمة في نفس الوقت ودي مش صدفة

يا كعبة عيني وعينها بشريها بيا

اِلهميها بكونها مش وحيدة واللي فيها فيا

اِرسميني قصادها في السما وسيبيلها هي الباقي

محدش طارد حلم يقظة أكتر من هوائي

يا ساكنة الضفة التانية وجودنا في القاع أمل لينا

بكرة مش هيلاقي حاجة ياخدها مننا فهيدينا

يا ساكنة الضفة التانية العرش والتاج في إنتظارك

وصلينا بسرعة يا أرض لقانا نقطة على مدارك

المرادي مش غريق في عرض أول قشة تظهر

المرادي المرسى نقطة قصادي كل ما أعوم بتكبر

مؤمن في كل وقت، متأكد لو في علامات

بمشي ورا إحساسي دايمًا، أنتو بتمشوا وراه ساعات

المرادي مش غريق في عرض أول قشة تظهر

المرادي المرسى نقطة قصادي كل ما أعوم بتكبر

مؤمن في كل وقت، متأكد لو في علامات

بمشي ورا إحساسي دايمًا، أنتو بتمشوا وراه ساعات

آخيرًا اتقابلنا وش لوش بدون وسيط

كل حاجة زي ما السما وصفتلي بإختلاف بسيط

طبيعي إن إحنا دوبنا تحت أول ليل قابلنا

حبنا لبعض اتولد قبل أول نظرة بيننا

اِحكيلي تاني كل حاجة حتى لو عادية

ده أنا بشوف نفسي فيكي أكتر ما أنا بشوفني فيا

كل بحبك كنت بقولها لحاجة منك في اللي قبلك

يعني كل كلام الحب اللي أنا كتبته ده اتكتبلك

بتأمل حياتي وهي بترسم سندريلا فيا

أثناء ما حياتك عالتوازي بتشكلك ليا

مستحيل تكون دي صدفة، جايز تطلع دي نظرتي

ما أنا نحات وخلق معنى من لا معنى دي شغلتي

اِحكيلي جديد وأنا هنحت تماثيل جداد

عايز كل يوم نعيشه يبقى أسعد من اللي فات

طب نعمل حاجة جديدة مادام مفيش حاجة تقوليهالي

مش عارف ليه زهقان؟ يا خوفي ليكون اللي في بالي

اِوعى تواجه الموهوم بشئ بإن شيئه اختفى

مفيش أصعب من الغروب عاللي متعلق بالدفا

ساعات لازم نعيش وجع وصدمة إنهيار أوهامنا

عشان نشوف حقيقة صعب حد يوريهالنا

اِوعى تواجه الموهوم بشئ بإن شيئه اختفى

مفيش أصعب من الغروب عاللي متعلق بالدفا

ساعات لازم نعيش وجع وصدمة إنهيار أوهامنا

عشان نشوف حقيقة صعب حد يوريهالنا

رفضنا نصدق إن نهاية القصة ابتدت

فضلنا بنرقص مع إن المزيكا اختفت

حاولنا نفضل سوا بكل وسيلة وكل حيلة

خلقنا بديل لكل بديل لكل خطة بديلة

فابتدى الملل وأبتديت أشوف عيوبك

وبدأت أحتاج مساحة لنفسي وأستتقل وجودك

وأضطريت أداري ده بكلام مكانش من جوايا

فأبتديت أشك في حبي ليكي أصلًا من البداية

إحنا في محنة، بس بنحلم والميت في حلمه حي

من أول يوم فرحنا وأنا قلقان من اللي جاي

مش تشاؤم ولا كآبة ولا مستكتر إني أرتاحت

بس للي في أعلى نقطة، أي طريق هيكون لتحت

يا اللي بين كل نجمة ونجمة جيتلك متأخرتش

بعترفلك إني أحتاجت أتحب وأحب فمفكرتش

يا اللي بين كل نجمة ونجمة ايه المشكله في كده؟

أكيد مسيرها تصيب، من فضلك اِوصفيلي غيرها

مش كل البدايات سعيدة ومش كل النهايات حزينة

مسيري هكتب غنوة كاملة تحبي تسمعيها

وحتى لو موهوم، الوهم بكل طاقتي أولى

عالأقل يتكتب على قبري نال شرف المحاولة

مش كل البدايات سعيدة ومش كل النهايات حزينة

مسيري هكتب غنوة كاملة تحبي تسمعيها

وحتى لو موهوم، الوهم بكل طاقتي أولى

عالأقل يتكتب على قبري نال شرف المحاولة