A Hell of a Dream

حلمت فيكي الليلة

متل كل ليلة

حاملة جبل وغيوم

فوقه نسر بيحوم

وبحر تحتك بيعوم

موجُه قطن مجدول

بِنَهر فضّة موصول

مرمي عَ ظهر خيول

حلمت فيكي الليلة

متل كل ليلة

واقفة بحقل من شوك

فستانك بالورْد مشكوك

وقمر على خدّك متروك

بالسّما نجمة وحيدة

ركضت وشوحت بإيدي

قربت وضلّيتي بعيدة

حلمت فيكي الليلة

متل كل ليلة

لاحق سراب صوتِك

محوّطني صدى سكوتِك

تايه ببطن حوتِك

وانتِ من وحْش هربانة

من سما بالموت غرقانة

وصخور من النّار هلكانة

حلمت فيكي الليلة

متل أيّا ليلة

واقف بصحرا من سواد

وبصحى على بحر من رماد

مش مصدّق صُرنا بعاد

وبعده الطريق مكسور

وخيمة بعامود مقهور

وروحِك بالفضا بتدور